Porta tia atgna pasta da paun

Naven da gliendisdis, ils 9 da november, ei ina gruppa dall’ABK Stuttgart a Dissentis/Mustér. Ella sefatschenta cul concepir digital al exempel d’in fuorn da cuminonza a Disla. Co sa il concepir digital sustener la veta communabla? A quella damonda sededicheschan studentas e students dil studi Architectura & Concepir digital dalla Staatliche Akademie der Bildenden Künste Stuttgart duront lur jamna da studi #FuornAviert. El center stat l’idea d’in fuorn da cuminonza a Disla. Pusseivladads da s’entupar cun las studentas ed ils students dat ei mintga sera naven dallas 18.00 tier il #BYOB el UHstudio. Specialmein mesjamna, ils 11 da november: Naven dallas 16.00 vegn fatg paun communablamein a Gonda cun Gion Michel Flepp. Tgi che vul sa purtar sia atgna pasta da paun e far paun ensemen. dissent.is/FuornAviert