"In Asen per Tello"

Per siu giubileum da 20 onns inscenescha l'Uniun da teater Sagogn in toc el liber. El curtgin baroc dil Casti Aspermont datti ina cumedia sursilvana, screta da Manfred Veraguth, che fa era gest reschia. Enqual fatg historic ei vegnius integraus ella inscenaziun "In asen per Tello". In schatg dil cuntegn: Tello, igl uestg da Cuera, ei en sia residenza a Sagogn. Gleiti vegn celebrau leu in usit pagaun ch'igl uestg vul scumandar. El ha bein in'idea co far quei, per che siu plan gartegi drova el denton in asen... L'entira Surselva ei documentada el testament che Tello ha fatg igl onn 765. La vischnaunca da Sagogn spezialmein. Leu possedeva igl uestg bia funs e regress. Il curtgin dil casti Aspermont ei aschia la culissa perfetga per quei teater el liber. Per che aspectaturs da lungatg tudestg san era suandar, datti ina projecziun cun surtetels. Avon mintga producziun porscha l'Uniun da teater Sagogn in aperitiv. In grazia fetg als aspectaturs pil giubileum da 20 onns.