Discussiun al podium: Surselva, tiara dalla missiun - ha la cardientscha cristiana aunc in avegnir cheu tier nus?

Duront survetschs divins ed autras fuormas da liturgia ein las baselgias vitas. La practica religiusa visibla ei ton sco svanida ord la veta publica dalla Surselva. Ductrina el senn da catechesa ed entruidament ella cardientscha ei per affons ed instruidras ed instruiders savens plitost in stuer ch’in vuler. Ei quella descripziun memia negativa? La pleiv roman-catolica da Laax pren la caschun da siu 500avel onn d’existenza da buca mo mirar anavos, mobein da ponderar e reflectar damondas digl avegnir religius en in context totalmein semidaus duront ils davos decennis. Il podium dat la caschun d’endriescher digl uestg Joseph Maria Bonnemain, dalla muniessa Monica Huppi, da Marion Hilber, responsabla per l’instrucziun da relegiun dalla Baselgia catolica dil Grischun e dil teolog ed assistent scientific alla Scola aulta da teologia a Cuera Claude Bachmann lur perspectivas per dar novs impuls alla veta da cardientscha. Moderaziun: Mariano Tschuor.