Mario Pacchioli - Concert "Canzuns ord mia valischa"

Sut il tetel “Canzuns ord mia valischa” envidan Mario Pacchioli e la vischnaunca da Trun a treis seras da conzert en sala da cultura. Dapi biars onns ei Mario sin viadi. Empau sco in vagabund dil temps modern ha el rimnau en sia valischa beinenqual melodia e historia ch’el presenta duront quels concerts. Amiez la sala in clavazin, la glischur da candeilas, ed entuorn entuorn sesa il public. En tutta intimitad raquenta Mario cun sias canzuns dalla patria, digl jester, da viadis e dad inscunters. Denteren cumparta el ina ni l’autra anecdota ord siu mintgadi d’artist. Ils concerts han liug fin november - ils dis vegnan pli cuorts e la glisch pli brausla. Ina biala occasiun da seveser cun amitgs, vischins ed amaturs dalla musica. Suenter il concert dat ei la pusseivladad da star ensemen tier in refrestg per cumparter in migiel, in discuors ni semplamein il plascher da star da cumpignia.