sömmis - Concert-matinée da la fuormaziun vocala ENsemble

ENsemble es üna fuormaziun vocala da 13 chantaduras e chantadurs laics da l’Engiadina chi’d es nada avant duos ons. Il tema dal concert es "sömmis". Sömmis naschan pelplü dürant la not, cur cha no durmin. La not tuorna mincha saira darcheu ed ans maina s-chürdüm, pos e sön. Uschè important sco cha la glüm dal di es per tuot la vita sün terra, tant misteriusa e fascinanta es per no umans la not, eir scha no per gronda part tilla manchantain durmind. La not ans regala sömmis. Il concert spordscha üna tscherna da chanzuns chi rapreschaintan ün arch paschaivel tanter il far not e l’aurora, passond tras ils sömmis. La litteratura tschernüda pel concert deriva da differentas epocas e va da la musica dal tard renaschimaint fin a quella contemporana. Eir las linguas chi vegnan chantadas fan ün grond arch. Quel va dal talian da Monteverdi fin pro’l russ da Rachmaninoff. Cun la matinée laina cumanzar insembel il nouv di cun clings quiets, inromats dal mumaint mistic da la bunura.