Concert dals Fränzlis da Tschlin

«Ils Fränzlis da Tschlin», quai sun Domenic, Anna Staschia, Cristina, Madlaina e Curdin Janett cun clarinetta, gïa, cello, viola e gïun. Ils/las tschinch musicantAs girunan cun paschiun e plaschair tras tuot ils stils da musica pussibels ed impussibels; minchatant bod «kitsch» e lura as ris-chna da’s metter a traviers in stils «privlus». Lur bun exaimpel es il violinist orb Franz-Josef «Fränzli» Waser (1858-1895). Cun sa gïa sunaiva’l be güst quai chi til plaschaiva e quai cha’l publicum laiva tadlar. Là, ingio cha el e seis musicants rivaivan gniva ballà fin la bunura. Pensond a «l’oriund Fränzli» dal 19avel tschientiner e cun cheus plain ideas nouvas giran uossa ils «Fränzlis nouvs» per tuot la Svizra intuorn. Els sunan musica dal muond cun fermas ragischs engiadinaisas. Fich greiv esa da definar lur «Fränzlisound» special. In mincha cas, i tuna bain, malgrà tuot las definiziuns.